Taxi driver wa miuli sa iPod, sikop

USA ka taxi driver ang gisikop sa kapulisan human niya gikawat ang mahalong iPod sa iyang pasahero alas 3:00 sa hapon niadtong Miyerkules.

Nasikop sud sa iyang pinuy-anan mao si Protacio Dagatan, 56, minyo, nagpuyo sa Purok 8, Upper Catitipan, Buhangin, siyudad sa Davao.

Si Dagatan malampusong gisikop sa kapulisan nga gipangulohan ni Police Senior Inspector Ronald Lao, hepe sa Sta. Ana Police Station.

Base sa blotter sa kapulisan, ang suspek positibong gitudlo sa biktimang si Irvin Alterado, molupyo sa Barangay Governor Vicente Duterte.

Matud ni Alterado nga misakay siya sa Maligaya Taxi nga dunay plate number LWY 855 nga gimaneho sa suspek uban ang iyang classmate.

Dihang mikanaug na sila sa dalang R. Castillo, suma sa biktima, iyang namatikdan nahibilin ang iPod32 nga nagkantidad og P48,000.

Gituktok nila ang bentana sa taxi aron pahibaluon nga duna silay nahibiling butang, apan kalit mipadagan sa taxi ang drayber.

Tungod sa maong hitabo, suma sa biktima, ilang gipahibalo sa kapulisan mao nga malampusong nasikop ang suspek.

Samtang gisuwat ning balita, gihikay na sa kapulisan ang kaso batok sa suspek aron ipasaka sa korte.