41 angol sa pagpamomba sa perya

KUWARENTAY uno ka mga tawo lakip na mga menor de edad ang mitugpa sa tambalanan human mibusikad ang granada samtang nagtan-aw sila sa usa ka circus nga pasundayag alas 9 sa gabii niadtong Sabado.

Ang insidente nahitabo sa covered court didto sa Purok 4, Barangay Fatima, Paquibato District, siyudad sa Davao.

Ang mga biktima mao sila Necio Cerundio, 21; Amalou Cabania, 13; Marcelo Babor, 52; Nelojean Roxas, 11; Jelson Bacordo, 22; Lemuel Uzon, 15; Elizer Sumodong, 29; Jessie Solla, 48; Candida Sambalod, 53; Jason Amaralinto, 15; Rubilyn Abayto, 34; Michael Tinaja, 15; John Mark Moquinto, 15; Rolando Abatayo, 32; Randy Loyola, 35; Rio Brigole, 24; Marvin Polinar, 20; Jeresa Malinao, 19; Primitiva Dadula, 56; Lindo Lina, 18; Louie John Ballena, 14; Noe Pulbera, 52; Dario Segundo, 33; Rolando Roperos, 47; Gerald Zamora, 18; Juris Bontoyan, 2; Devine Grace Valejo, 16; John Miguel Lucian, 23; Genelyn Cambarihan, 31; Charmaine Lansang, 13; Marjorie Esucultor, 34; Rutchelle Bontoyan, 39; Rudith Montajes, 28; Gemar Bacordo, 24; Regine Lansang, 17; Rolando Palban, 18; Marion Sumod-ong, 53; Samson Dandoy, 19; Gerald Lariosa, 16; Helena Turado, 54; Michael Cambarihan, 3, pulos molupyo sa Barangay Fatima, Paquibato District.

Si Rudith Montajes nagbutyag sa Sun.Star Superbalita Davao nga wa nila damha nga ang kalipay nga ilang gibati samtang nagtan-aw sa pasundayag, kalit hulipan og kasakit human mibusikad ang granada.

"Maayo gani kay nasangit ang granada sa pukot nga gibutang sa stage nga gigamit nga detachment sa military. Kay kung wala pa, daghan gyud seguro ang casualties sa tunga sa covered court," sulti ni Montajes.

Si Kapitan Rommel Cozo nagbutyag sab sa Superbalita nga sa kasamtangan wa pa sila masayud kung kinsa ang naglabay sa granada.

"Padayon pa ang investigation sa otoridad. Ug ang among giatiman karon mao pa ang mga victims nga matambalan," sulti ni Cozo.

Si Nanette Macapundag, hepe sa Lingap Center sa City Mayor's Office, nagbutyag sab nga gi-abaga na sa lokal nga gobyerno ang galastuhan sa mga biktima sa hospital.

Giingon nga dunay circus sa maong lugar isip kabahin sa ilang mga kalingawan sa umaabot nga kapistahan karong Septiyembre 12 hangtud 13.

"Nakagawas na ang 28 ka mga biktima. Trese na lang ka buok ang nabilin karon dinhi sa Southern Philippines Medical Center," sulti ni Macapundag dihang gihinabi kagahapon sa hapon.

Sa laing katikaran, si Colonel Lysander Suerte, commander sa 1003rd Infantry Brigade sa 10th Infantry Division sa Philippine Army nagbutyag nga mitabang na karon sila sa pagpangita sa mga tawo nga maoy miitsag granada sa mga biktima.

Mga biktima nagsulti nga tungod sa nahitabo, mahimong mingaw ang ilang kapistahan sanglit nahadlok na ang katawhan nga masubli ang paglabay og granada.