Konsehal gitipi, gipalutaw sa sapa
-A A +ATuesday, September 4, 2012
KIDAPAWAN CITY -- Patay na nga nakit-an ang kanhi municipal councilor ug blocktime radio announcer sa North Cotabato alas 3:20 sa hapon niadtong Domingo didto sa probinsiya sa Maguindanao.
Giila ang biktima nga mao si Eddie Jesus Apostol, kanhi announcer sa programa sa Philippines Councilor's League sa usa ka sibyahanan sa radyo sa siyudad sa Kidapawan.
Si Apostol kanhi konsehal sa munisipyo sa Magpet, North Cotabato.
Matud ni Cotabato Police Provincial Director Senior Superintendent Cornelio Salinas nga nahanaw ang biktima niadtong Agosto 29, 2012.
Nasayran nga nag-treasure hunting ang biktima sa utlanan sa probinsiya sa Cotabato ug Maguindanao.
Nakaplagan ang patay’ng lawas ni Apostol nga naglutaw sa Rio de Grande Mindanao didto sa Sitio Tinolosan, Barangay Masulot, Sultan Sabarongis, Maguindanao.
Ang biktima nakaangkon og duha ka samad pinusilan sa ulo nga maoy hinungdan sa iyang kamatayon.
Nasayran nga gigapos sa mga kriminal ang iyang mga kamot ug tiil.
Si Magpet Mayor Efren Piñol nagsulti nga dunay kasabot ang biktima sa treasure hunting niini sa Pikit, Cotabato.
Sa kasamtangan, nagpadayon ang imbestigasyon sa kapulisan aron matumbok kon kinsa ang mipatay sa biktima. (Edgardo Fuerzas)
Gipatik sa mantalaang SuperBalita Davao Septembre 04, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
