Mga manok sa mayor sa farm gipangawat
-A A +AMonday, September 10, 2012
GIKAWAT sa mga wala mailhing kawatan ang 14 ka mga igsasabong nga manok sulod sa farm sa mayor sa Malita, Davao del Sur.
Nahitabo ang insidente alas 4:00 sa kaadlawon niadtong Dominggo didto sa Barangay Tacunan, Tugbok District, siyudad sa Davao.
Ang farm gipanag-iyahan ni Claude Peralta Bautista, hamtong ang pangedaron, mayor sa Malita, Davao del Sur.
Base sa spot report ni Police Officer 3 Narciso Potot Jr. sa Talomo Police Station, nasayran nga nadiskubrehan sa caretaker sa CPB Farm nga si Sabtorani Contigo, 51, minyo, nga nawala na ang 14 ka mga igsasabong nga manok nga gilansag.
Mokabat ngadto sa dili moubos sa P210 mil ang kantidad sa mga manok nga gikawat.
Dugang nasayran nga gipangputol sa mga kawatan ang higot sa mga manok gamit ang mahait nga butang.
Mga kawatan nakasulod sa maong farm pinaagi sa pagkatkat sa kural ug gipanghulbot ang mga barbwire.
Mihimo na og follow up operations ang kapulisan aron nga mailhan ang mga kawatan ug madakpan. (Blue Cordero)
Gipatik sa mantalaang SuperBalita Davao Septembre 11, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
