CIDG motabang sa pagsusi pagpamusil sa 3 magsuon
-A A +AFriday, September 14, 2012
DAVAO DEL NORTE - Gipasalig sa buhatan sa Criminal Investigation and Detection Group - Davao del Norte (CIDG-DavNor) nga motabang sa Tagum City Police Station (TCPS) sa pagsulbad sa pagpamusil sa tulo ka magsuon kon diin usa ang namatay.
Kahinumdoman nga patay ang usa ka lalaki human giluthang sa duha ka wala mailhing suspek nga sakay sa motorsiklong RUSI, kolor gray-itom nga walay plate number niadtong Sabado didto sa Purok Jalandoni, Barangay Visayan Village.
Ang namatay giila sa pangalang Mario Minta, 30, ulitawo, molupyo sa Barangay Magupising, Braulio E. Dujali, Davao del Norte.
Nahitabo ang pagpamusil sa biktima alas 12 sa udto sa maong adlaw, uban ang iyang duha ka mga igsuon nga sila si Romnick, 24, ug Braulio, 29, samtang namisita sa balay sa usa ka Eva Moto.
Mosulod na unta si Mario sa balay ni Moto, apan kalit nga miabot ang duha ka suspetsado nga sakay sa usa ka Honda Wave nga motorsiklo ug gipusil siya nga miresulta sa hinanali niyang kamatayon.
Samtang mosibat na unta ang mga mamumuno, gipabuthan sab nila Romnick tumong sa dughan ug Braulio nga suwerteng wala maigo.
Nasayran gikan kang Police Chief Inspector Darwin Rafer, hepe sa CIDG-DavNor, nga palawman pa nila ang ilang imbestigasyon aron masayran kon unsa gyud ang motibo sa pagpamusil sa magsuong Minta. (Teddy Cabana)
Gipatik sa mantalaang SuperBalita Davao Septembre 15, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
