Minyo gikombikto sa kasong lugos

ANG Regional Trial Court (RTC) nagsentensiya sa 39-anyos nga lalaki nga mabilanggo sud sa bayente ka tuig tungod sa paglugos sa iyang 24-anyos nga hinigugma niadtong 2006.

Gisentensiyahan ni RTC Branch 11 judge Virginia Europa mao si Ruperto Rubillar Jr., kanhi jeepney drayber, tungod sa paglugos ni Rebecca (di tinuod nga pangalan) niadtong Oktubre 12, 2006 sa Davao Motel sa Cabaguio Avenue, siyudad sa Davao.

Ang korte nagmando sab kang Rubillar nga mobayad sa biktima sa kantidad nga P75,000 alang sa civil indemnity ug P50,000 isip moral damages.

Base sa hukom sa huwes, ang biktima mitestigo nga gisugo siya sa iyang inahan nga dunay paliton niadtong higayona.

Samtang naghulat siya og dyip, miabot si Rubillar sakay sa motorsiklo ug gihanyagan siyang mosakay.

Misalig ang biktima sa kombiktado tungod kay managhigala sila sa iyang amahan.

Samtang sakay ang biktima sa motorsiklo, wa siya masayud nga gidala siya sa motel.

Si Rebecca nagsulti nga gipugos siya pagpasulod sa kuwarto, gihuboan ug dayon gilugos.

Misuway siya pagsukol sa kombiktado apan pakyas siya.

Sa laing bahin, gibutyag ni Rubillar miadto siya sa machine shop aron bayaran ang gipaayong dyip.

Human siya nakabayad, suma ni Rubillar, ang biktima nag-imbita kaniya sud sa Davao Motel mao nga misugot siya.

Gipangatarungan niya nga ang nahitabo nila usa ka sinabotan, apan wa mituo ang korte sa depensa sa kombiktado.

"It is noteworthy that the private complainant was merely 18 years old at the time of the incident and would surely be cowed by a man who was several years her senior and even one who is a friend of her father," suma sa korte.

Drama sa korte

Samtang gibasa sa ang desisyon sa korte, naghilak ang biktima nga naminaw samtang ang kombiktado, kahilakon nga nakigsulti sa iyang abogado.

Nagsige lamang og tan-aw ang kombiktado sa iyang asawa nga naglingkod sa likod ug ngadto sa biktima nga naglingkod sab sa likod sa iyang asawa.

Misamot ang tensiyon dihang gianunsiyo sa korte nga si Rubillar guilty beyond reasonable doubt.

Ang biktima migakos sa iyang igsuon samtang si Rubillar migakos sab sa iyang asawa ug kabanay atol sa promulgasyon.

Ang kombiktado duna pay kinse ka adlaw nga makaapela sa Court of Appeals o Supreme Court. (Arianne Caryl N. Casas)