Pagkarnap sa 3 sakyanan sa Buhangin sulbaron

PURSIGIDO karon ang Buhangin Police Station nga sulbaron ang tulo ka sagunsong kaso sa pagpangarnap sa ilang area of responsibility niadtong Huwebes.

Gipalihok na karon ni Police Superintendent Ruben Ramos, hepe sa Buhangin Poilce Station ang iyang mga Intelligence operatives sa pagpanguna ni Senior Police Office 1 Vicente Yizon sa paghimo og follow up operations aron nga ilhon ang mga karnaper sa mga sakyanan.

Gitutokan sa mga imbestigador ang anggulong usa lamang ka grupo ang mihimo sa pagpangarnap tungod kay managsama ang estilo nga gigamit base sa mga pahayag sa mga saksi.

Mga karnaper migamit, matud pa, og improvised nga butang aron nga maabrihan ang mga sakyanan.

Mga sakyanan nga nakarnap nahitabo tanan didto sa area sa Cabantian.

Unang nabiktima mao si Dante Alon, 52, plantation manager sa Comval Tropical Fruits Inc. kon diin nakarnap ang iyang Toyota Hilux samtang giparada lang atubangan sa iyang balay didto sa Ciudad Esperanza sa Barangay Cabantian, Buhangin.

Ikaduha mao si Stanley Tudlo, 32, area supervisor sa Japan Tobacco International Philippines kon diin nawala ang iyang Toyota Avanza nga giparada atubangan lang usab sa iyang balay didto sa Emily Homes sa Cabantian, Buhangin.

Ikatulo mao si Antonio Teh kon diin nawala ang iyang Fortuner nga sakyanan nga giparada lang sa balay sa iyang personal assistant nga si Mary Joy Dela Victoria didto sa Deca Homes, Cabantian, Buhangin. (Blue Cordero)