Davao del Sur: Bautista nanukad na sa 2013 election
-A A +AWednesday, September 19, 2012
DAVAO DEL SUR -- Kumpirmadong modagan pag-usab ang naparot nga gobernador nga si kanhi second district Representative Claude Bautista, kini sigun maguwang niyang si Malita Mayor Benjamin Bautista.
Nasayran nga kumpleto na ang line-up sa mga Bautista ug andam na kini sa pagsang-at sa ilang certificate of candidacy (COC) karong sunod bulan.
Si Mayor Benjamin subling magpapili aron tiwason ang katapusang termino sa Malita.
Ang maguwang niini nga si second district Representative Franklin Bautista subling magpapili sa susamang posisyon.
Gikatahong naplastar na sab ang ilang mga kandidato nga modagan sa duha ka mga distrito sa Sangguniang Panlalawigan.
Apan wa pa gipaguwa ang ngalan sa mga kandidato pagka-bokal.
Wala pa sa'y desisyon kung kinsa ang modagan pagka-kongresista sa unang distrito ingon man ang bise-gobernador ni Bautista.
Apan sumala ni Mayor Bautista, posible nga si Bise-Gobernador Arsenio Latasa maoy modagan pagka-Kongresista sa Unang Distrito.
Nasayran nga ang mga Bautista modagan ilawom sa Liberal Party nga partido ni Presidente Benigno Aquino III.
Wa sab gibutyag sa mga Bautista kung unsang adlawa gitakda ang ilang pagsang-at sa sertipiko sa kandidatura apan mahitabo kini gikan sa Oktubre 1 nga matapos alas 5:00 sa hapon sa Oktubre 5 subay sa gitakda sa Commission on Election. (Orlando Dinoy)
Gipatik sa mantalaang SuperBalita Davao Septembre 20, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
