'White lady’ gikagubtan
-A A +ANi Alger Dura
Wednesday, September 19, 2012
NAGKAGUBOT ang mga personahe sa Sun.Star Davao Publishing Incorporated dihang nakita ang hulagway gikan sa cellphone nga nagpakita sa usa ka White Lady.
Ang hulagway nakuha sa cellphone ni Mary Ann Baclao, 31, minyo, nagpuyo sa Purok 1, Mangganian Street, Barangay Tibungco, siyudad sa Davao.
Si Baclao unang nagpahibalo sa Sun.Star SuperBalita pinaagi sa text nga duna siyay kahibulungan nga kuha sa video niadtong alas 3:00 sa hapon niadtong Septyembre 5, 2012.
"Sir, may video po sa cellphone ko. Gusto ko ipasa sa inyo sa bluetooth. I-text n'yo lang ako kung gusto ninyo. Kasi yung girl, hindi ko nakita video after kinunan ko ang aking mga anak. Pero after one week, nung tiningnan ko ulit, lumabas na ang babae sa video," suma sa text ni Baclao.
Si Baclao mibisita sa buhatan sa SuperBalita niadtong Martes, iyang gipakita ang kuha niya sa video nga dunay usa ka babaye nga nagsul-ob og puti nga bistida.
Makita sa video ang duha ka mga anak ni Baclao nga nagdula sa ilang kuwarto diin kalit milutaw ang usa ka babaye nga gikan sa bungbong.
"Ako lang gikuhaan ang mga bata kay wala man mi lingaw sa balay. Akong gi-save sa cellphone para naa koy file video sa akong mga anak," suma ni Baclao niadtong Martes.
Gisukit-sukit sa SuperBalita ang maong ginang basin iyang gi-edit ang video, apan sinsero niyang gisulti nga genuine ang maong video footage.
"Wala intawon uy. Ako lang ning gipahibalo para ma-aware ang mga tawo," sulti ni Baclao.
Si Randy Manuay, Computer Science graduate ug formatter sa Sun.Star Davao, nagbutyag nga sa iyang nakita sa video -- makatuo siya nga wa gi-edit ang maong footage.
"Makita man nato nga nagdula ang mga bata dayon kalit lang mitunga ang babaye sa scene," pahayag sab ni Manauay.
Dihang nakita sa mga empleyado sa Sun.Star Davao ang hulagway nga gisud sa desk top computer, nanglimbawot ang ilang balahibo.
"Genuine talaga ang video - no tricks," ni senior reporter Rhona Goc-ong nga maoy nag-upload sa video niadtong Martes.
Naobserbahan sa video nga ang babaye naglakaw paingon sa kusina nga daw naglutaw sa salog, nagsul-ob og lubos puti nga bistida.
"Nagtuo ko nga gipahinumdoman ko sa namatay nakong lola kay wa gyud ko nakaduaw niya sa sementeryo," panaghap ni Baclao. (Alger P. Dura)
Gipatik sa mantalaang SuperBalita Davao Septembre 20, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
