Abogado gihulga patyon

USA ka abogado ang gihulga sa wa mailhing lalaki pinaagi nga patyon alas 8:00 pasado sa gabii niadtong Miyerkules.

Base sa spot report sa Talomo Police Station, ang biktima mao si Atty. Renato Pagatpatan.

Si Pagatpatan gihulga pinaagi sa tawag sa telepono nga nagkanayon, "you'll be next" human siya nakig-istorya sa mga homeowners sa Victoria Village, Barangay Matina Aplaya, siyudad sa Davao.

Ang biktima nakig-istorya sa mga homeowners sa dapit diin nahitabo ang pagrapido sa entrance gate sa maong subdivision.

Nasayran sa imbestigasyon ni PO3 Harold Delima nga duha ka mga tawo ang miabot sa bag-ong gitukod nga gate sa lugar.

Ang duha ka mga tawo nasiplatan ni Ebone Lemondo nga mipabuto sa ilang armas.

Mga nagpabuto gikatahong yano lamang naglakaw paingon ilang motorsiklo dayon mipaingon sa kasikbit nga Poly Subdivision.

Napulo ka minuto human sa pagpamusil, dunay nanawag kang Pagatpatan sa cellphone nga nanghulga.

Naningkamot karon ang kapulisan nga mailhan ang mga tawo nga namusil sa gate ug nanghulga sa abogado aron pasakaan og kaso sa korte.