Electrician gipatay sa naka-motor
-A A +AFriday, September 21, 2012
TAGUM CITY - Patay ang usa ka electrician human gipusil sa nag-inusarang suspek alas 5:20 sa buntag niadtong Huwebes didto sa National Highway, Barangay Mankilam.
Biktima giila nga si Orly Ollegue, 39, minyo, molupyo sa Block 23, Lot 25, Uraya Subdivision, Barangay Mankilam, Tagum City.
Sa imbestigasyon ni Senior Police Officer 1 Gene Beñares sa Tagum City Police Station (TCPS), nasayran nga ang biktima sakay sa iyang motorsiklong Honda, ladies type, kolor itom sagul pula, ug angkas ang usa ka Alexis Llega, 36, biyuda, self-employed, molupyo sa Purok Malinawon, Barangay East, Tagum City.
Gikan sa iyang gitrabahuang electrical shop ang biktima sa Sta. Cruz Avenue, Mankilam, Tagum City atol sa hitabo.
Dihang paggawas na ang biktima sa National Highway, samtang hinay ang dagan niya, kalit siya nga gisugat sa nagkalong suspek ug gipusil sa makadaghan nga higayon gamit ang .45 nga pistola.
Ang biktima nga nahagbong pa sa kanal human mahagba, naka-angkon og samad pinusilan sa ulo ug lawas.
Suwerte lamang ang angkas sa biktimang si Llega tungod wa gyud kini tatsa.
Saysay ni Llega nga nakita niya ang suspek mga 20 metros ang gilay-on gikan kanila nga daling mikabayo sa usa ka motor human gihimo ang krimen.
Padayon pa sab nga gisuta sa kapulisan ang motibo sa pagpatay sa electrician. (Teddy Cabana)
Gipatik sa mantalaang SuperBalita Davao Septembre 22, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
