Nalisoan pangisip, nahagbong sa lubi

PADADA, Davao del Sur - Gidudahang nawad-an sa saktong panghuna-huna ang usa ka lalaki kinsa mikatkat sa punoan sa lubi apan nawad-an og balanse hinungdan nga nahulog.

Padayong gi-obserbahan sa mga doktor sud sa Davao del Sur Provincial Hospital (DDSPH) ang biktimang si Jesus Baynosa, 42, ulitawo nga molupyo sa Barangay Bagong Silang.

Subay sa imbestigasyon sa kapulisan, banda alas 7:00 sa buntag niadtong milabay'ng adlaw, misaka sa lubi si Jesus, nga adunay kahabugon nga kapin 15 ka dupa.

Suma sa pamilya ni Baynosa nga naglingkod-lingkod sa palwa sa lubi ang biktima kinsa wa makakaon og pamahaw lakip na paniudto.

Pagka-alas 2:00 sa hapon nasapli ang palwa sa lubi nga iyang gilingkuran ug nahulog ang biktima. Wala na makabarog ang biktima sa ubos nga bahin.

Ang biktima pabiling gidapatan og medikasyon human gidala sa balay tambalanan.

Saysay ni Lupi Baynosa, igsuon sa biktima nga maayong pagkabali sa bukog sa hawak ug likod sa lawas sa biktima gumikan sa pagkahug niini.

Niya pa, dili na malihok ni Jesus ang iyang lawas, nga paralisado sa kasamtangan.

Dugang sa igsuon sa biktima nga bag-uhay lamang nakagawas sa Davao Mental Hospital ang iyang igsuon human nalisoan sa maayong pangisip.

Nanaghap sab si Lupi, nga mibalik na sab ang sakit sa biktima nga maoy hinungdan nga kalit kining misaka sa lubi ug nagpundo didto og kapin pito ka oras. (Orlando Dinoy)