Nangayam, gikilatan

NORTH COTABATO - Usa ka tawo ang patay ug laing usa ang naangol sa diha nga naigo sa kilat alas 7:00 sa gabii niadtong Biyernes.

Giila ang nakabsan sa kinabuhi nga mao si Edgardo Lozada, 36, minyo, ug molupyo sa Barangay Poblacion Uno, M'lang samtang naangol sab ang iyang kauban nga si Jaharmin Mamasalagat.

Si Luigi Salazar, kauban sa mga biktima, nagsulti nga nangayam sila og baboy ihalas sa Barangay Dungguan.

Apan sa dihang pauli na sila, kalit nga mibundak ang kusog nga ulan.

Namasilong sila sa punoan sa kahoy apan kalit nga midalugdog og kusog dungan sa pagkilat hinungdan sa pagkaigo sa mga biktima.

Sentro matud pa nga naigo si Lozada sa ngipon sa kilat nga maoy hinungdan sa iyang kamatayon.

Nasunog ang tibuok lawas sa biktima hinungdan nga namatay.

Naangol si Mamasalagat sa mga sanga sa kahoy nga nangaputol human nga maigo sab sa kilat.

Pipila pa ka oras una naugkat ang patay nga lawas ni Lozada tungod kay nagkalayo pa ang maong lugar.

Samtang si Mamasalagat gidala sab sa balay tambalanan.