Putol nga ulo nakit-an daplin sa sapa | SunStar

Putol nga ulo nakit-an daplin sa sapa

Time to read
1 minute
Read so far

Putol nga ulo nakit-an daplin sa sapa

Friday, April 21, 2017

GIKALISANG sa mga residente ang putol nga ulo sa tawo daplin sa sapa sa Purok 6, San Roque, Barangay Calinan Proper, Calinan District, dakbayan sa Davao niadtong Biyernes, Abril 21.

Si Police Senior Inspector Leo Alce, deputy station commander sa Calinan Police Station, nagbutyag nga usa ka Irica Polo Yogue, 21, overseas Filipino worker (OFW), taga Purok 22, Robillo Compound, Calinan ang miduol sa kapolisan aron mo-follow up sa giingong putol nga ulo nga nakita daplin sa sapa.

Nasuta nga ang biktima mao ang ilang kamaguwangan nga si Edmond Polo Yogue, 33, nagpuyo sa nasampit nga dapit kinsa na-missing niadtong Abril 18, 2017.

Sa gihimong follow up operation sa kapuoisan, gidala ang ulo sa biktima sa Angel Funeral Parlor aron isumpay sa lawas nga unang napalgan nga naglutaw sa sapa niadtong Abril 18.

"Nag-adto ta sa purok leader sa dapit kay didto daw mitahan kaniya ang tulo ka suspek sa pagputol sa ulo sa biktima," sulti ni Alce.

Niadtong Huwebes, mitahan ang tulo ka suspek nga sila Gualberto Elba Cañada, 29, ulitawo, Nole Ampon Talay, 48, mag-uuma ug Michael John Secadron Basoy, 20, pulos nagpuyo sa Purok 21, San Roque, Calinan Proper.

"Gikainom pa sa mga suspek ang biktima, pero kining victim duna na sila'y daan nga dumot aning usa sa mga suspek," dugang ni Alce.

Giingong gidala ni Cañada ang biktima sa likod sa balay ug didto gitigbas sa liog gamit ang 19-pulgada nga sundang.

"Base sa atong imbestigasyon, gitigbas ni Cañada ang liog dayon gipadayon ang paggulgol hangtod naputol ang liog ug gilabay sa sapa," sumpay ni Alce.

Gidugang sa opisyal nga gibaharan pa ni Cañada nga patyon ang duha niya ka kauban kung di kini motabang kaniya.

"Tulo gyud sila nga atong kasohan og murder kay mitabang pod ning duha ka suspek," sulti ni Alce kinsa naghulagway sa pagdayong sa tulo sa lawas sa biktima padung sa sapa.

Sa kasamtangan, ang tulo ka suspek gipangbalhog na sa selda sa Calinan Police Station samtang giandam na ang kasong murder batok kanila.

Gipatik sa mantalaang Superbalita Davao Abril 22, 2017.

View Comments