Representante sa DPWH gikastigo sa SP atol sa sesyon | SunStar

Representante sa DPWH gikastigo sa SP atol sa sesyon

Time to read
less than
1 minute
Read so far

Representante sa DPWH gikastigo sa SP atol sa sesyon

Friday, April 21, 2017

DIGOS CITY -- Gigisa sa mga miyembro sa City Council ang representante sa Department of Public Works and Highways (DPWH) atol sa sesyon, Huwebes sa hapon, Abril 20.

Gituki ni Konsehal Serafin Senajon ang mga proyektong gihimo sa DPWH sa dakbayan human nga way koordinasyon sa lokal nga gobyerno diin matud sa opisyal usa ka kalapasan sa local ordinance.

Adunay daghang proyekto nga gibuhat ang DPWH sa dakbayan sa Digos ug usa niini ang 381 metros nga konkretong kalsada sa dalang Lopez Jaena.

Gipasabot ni Engr. Teresa Rocaferte, representante sa DPWH, nga aduna silay giapas nga time frame sa ilang labaw'ng ahensiya mao nga wa na ang koordinasyon sa lokal nga gobyerno.

Apan giklaro ni Senajon nga usa kini ka dakong tamparos sa lokal nga gobyerno kay bisan ang amahan sa dakbayan wala gipahibawo sa DPWH kalabot sa ilang mga gisugdang proyekto.

"Buot ba ipasabot nga abi kay nasyonal mo nga gobyerno dako na ang inyong ulo, kay wala na mi gipahibawo ninyo," si Senajon nangutana kang Rocaferte.

Hinuon, giangkon ni Rocaferte nga adunay kalapasan ang ilang ahensiya sa paghimo og proyekto nga wa gipahibawo ang mga opisyal nga gobyerno.

"Nananghid gani mi usa, Sir, pagtukod namo sa district office dinhi sa dakbayan," ni Rocaferte.

"Mao gani nga moduol lang mo sa amoa kung naa mo'y kinahanglan," ni Senajon kinsa dugay midawat sa eksplinasyon sa DPWH human nangayo og pasaylo si Rocaferte. (Orlando B. Dinoy)

Gipatik sa mantalaang Superbalita Davao Abril 22, 2017.

View Comments