ANG Eastern Mindanao Command (EMC) ug Police Regional Office (PRO)-Davao Region nagkondena sa pinakakusog nga termino sa uwahing kasamok nga gihimo mga sakop sa rebeldeng New People's Army batok sa Lapanday, Macondray ug Lorenzo rubber plants sa Davao City.
Ang EMC pinaagi sa ilang tigpamaba, Major Ezra Balagtey, ug PRO-Davao Region pinaagi sa ilang tigpamaba, Police Cheif Inspector Andrea dela Cerna, nagbutyag nga nasubo sila alang sa mga inosenteng biktima ug pamilya nga apektado sa maong terorismo nga buhat, hinakog, ug desperado nga pagpangatake.
Ang ilang pagpangatake klaro kaayo nga nagpakita sa ilang wa pagtamod sa mga balaod ug Human Rights, sukwahi sa gipasiatab sa NPA.
Ang pagpangatakae gitumong sa pagpakauwaw sa gobyerno sanglit ang Davao City gitakda nga mag-host sa importante nga kalihukan.
Ang EMC ug PRO-Davao Region, sa laing bahin, buot maneguro sa publiko nga ang papangatake usa ka isolated nga insidente sa hilit nga lugar, ug ang dugang pagbantay himuon alang sa seguridad sa siyudad.
Ang mga opisyal naghangyo sa publiko nga magpabilin nga igmat ug itaho dayon sa otoridad kung dunay mga katahapang tawo sa ilang palibot.
Sa laing katikaran, gibutyag sab ni Davao City Police Office Director Alexander Tagum nga ilang gikondena ang gihimo sa NPA nga midaut sa imahe sa dakbayan.