DI PA lamang dugay, atong gisaulog ang adlaw sa mga mamumuo niadtong Mayo 1, panahon nga atong gipadangat ang mulo ngadto sa gobyerno, o kaha sa mga agalon nga mapahimuslanon.
Sa maong adlaw, bida ang atong mga mamumuo ilawom sa Kilusang Mayo Uno, kinsa maisugon nga mopasibaw sa ilang mulo sa kadalanan, labi na ngadto sa mga ahensya sa gobyerno.
Apan subay sa kasinatian sa mga empleyado sa Korean-invested banana plantation sa Compostela Valley Province, ilang gireklamo karon ang progresibong grupo nga KMU nga padayon nga nagbarikada sa kompaniya.
Ang Shinsun Tropical Fruits Corporation midangop sa media human gipahunong sa KMU ug 37 ka contract-expired workers ang ilang operasyon mao nga naalkansi ang kompanya sa gibana-bana nga P2 milyones matag semana.
Sa atong nasayran, buot mobalik ang 37 ka contract-expired workers sa kompaniya isip regular workers apan sa subay sa assesment sa National Conciliation and Mediation Board sa Davao Region (NCMB) Region 11, ang mahatag sa kompaniya mao lamang ang ilang mga separation fees.
Kini suma ni NCMB-Davao Officer-in Charge Airrine Marie Reyes sa pakighinabi sa SunStar Davao.
Ang pagkahunong sa kontrata sa 37 ka empleyado sa Shinsun Tropical Fruits Corporation resulta sa wa pag-renew sa manpower agency nga nagsuplay og mga trabahante sa kompanya.
Subay sa Department Order 174 nga gipaguwa Marso 2017, ang manpower agency wa mi-renew sa ilang labor permit tungod sa pagtaas sa capital amount gikan P3 milyones hangtud sa P5 milyones.
"(There was) not (enough) money to afford. Agency did not renew all contractual workers after end of contract," ang official statement ni In Joon Kim, tag-iya sa Shinsun Tropical Fruits Corporation.
Tungod niini, wala na midawat og trabahante ang kompanya mao nga dunay nahitabo nga illegal strike sa kompanya nga nagtanum og saging sa 135 ektaryang luna sa Compostela Valley Province.
Niadtong miaging semana nagpanon usab ang kapin 200 ka mga empleyado sa kompanya ngadto sa Department of Labor and Employment aron hangyuon ang ahensya nga pahunuongon ang mga nag-strike aron makabalik sa operasyon ang kompanya.
*****
Sa sunod guwa ning atong pagtuki, atong ipatik dinhi ang pahayag sa KMU labot sa maong isyu.