Giyera batok druga padayon bisan sa Holy Month of Ramadan | SunStar

Giyera batok druga padayon bisan sa Holy Month of Ramadan

Time to read
1 minute
Read so far

Giyera batok druga padayon bisan sa Holy Month of Ramadan

Wednesday, May 17, 2017

COTABATO CITY - Palig-unon pa ang kampanya batok sa gidiling druga sa probinsiya sa Maguindanao bisan magsugod na ang Holy Month of Ramadan.

Kini maoy giklaro ni Datu Montawal Maguindanao Vice Mayor Datu Otho Montawal.

Gibahad sa bise mayor nga walay time-out sa war on drugs sa Datu Montawal hangtud nga masumpo ang mga tawo o grupo nga nalambigit sa illegal drug trade.

Samtang dako ang pasalamat sa bise mayor sa gipagawas nga taho sa Philippine Drug Enforcement Agency (PDEA-Armm) ug Criminal Investigation and Detection Group (CIDG) nga bisan 1 percent, wala sila malambigit sa illegal drugs.

Giakusahan ang bise mayor ug ang iyang amahan nga si Mayor Datu Vicman Montawal nga nalambigit sa illegal drug trade sa una nga listahan nga gipagawas ni Pangulong Rodrigo Duterte.

Apan dako ang pagtuo sa mag-amahan nga biktima lamang sila sa hugaw nga dula sa politika ug pagpangdaut sa ilang pamilya.

Hinuon, wala sila madismaya sa gipagawas nga listahan ni Presidente Duterte ug misuporta gihapon sa war on drugs.

Kahinumdoman nga nagpagawas og shoot-to-kill order ug ganting P50 mil ang mag-amahang Montawal sa mga tawo nga makadakop, patay man o buhi, sa mga drug pushers o grupo nga nalambigit sa pagpamaligya og shabu.

Gimandoan sab sa mga opisyal ang mga pulis nga kung mosukol ang mga drug pushers sa ilang operasyon seguruhon nila nga mapatay kaysa sila pa ang maunhan.

Samtang sa mga drug surrenderees nga gustong magbag-o tabangan sila sa LGU apan sa mga nagpadayon sa pagpamaligya og shabu posibleng makadawat sila og regalo nga lungon.

Halos drug free na ang Datu Montawal sa pagtinabangay sa tanan nga mga sektor, kapulisan, militar, MNLF, MILF ug mga religious group.

Pabor sab si Montawal sa estilo ni Pangulong Rodrigo Duterte sa war on drugs ug mga lakang nga gipatuman ni PNP Chief Director General Ronald "Bato" Dela Rosa sa paglutos sa mga nalambigit sa illegal drugs. (EEF)

Gipatik sa mantalaang Superbalita Davao Mayo 18, 2017.

View Comments