Kasong 'arson' ipasaka batok NPA | SunStar

Kasong 'arson' ipasaka batok NPA

Time to read
1 minute
Read so far

Kasong 'arson' ipasaka batok NPA

Thursday, May 18, 2017

MOPASAKA og kasong arson ang Bureau of Fire Protection (BFP) sa Davao del Norte sunod semana batok sa mga sakop sa New People's Army (NPA) kinsa midabdab sa Macondray Plastics Products, Incorporated sa Panabo City niadtong Abril 29.

Si Davao del Norte police chief Senior Superintendent Marcial Magistrado, atol sa AFP-PNP press forum sa Davao City Police Office (DCPO) conference room Huwebes, nagsulti nga siya gipasaligan sa mga personahe sa BFP kinsa naggunit sa kaso nga sa sunod semana, ilang iduso ang kasong arson kay naghuwat na lang sila og resulta sa katapusang imbestigasyon sa danyos sa mga propedad, nga mikantidad og mga P1 bilyones.

"Pag dumating na po 'yung result ng investigation or arson report nila, magpa-file na ng case," pasalig niya.

Niadtong Mayo 4, ang Panabo Police Station mipasaka na og kasong robbery in band didto sa Panabo Prosecutors Office batok sa duha ka naila nga suspek sa kapin 100 ka sakop sa NPA tungod sa pagpangawat og usa ka shotgun ug upat ka mugbo nga mga pusil.

Sayo niini, ang mga rebeldeng komunista nag-dis-arma sa unom ka mga guwardiya sa kompaniya.

Ang nailhan nga mga suspek mao sila si Elizalde Cañete, alyas Ka Jinggoy ug Walberto Aligato, alyas Ka Boging sa Pulang Bagani Command (PBC 1).

Gikanayon niya nga mga nahisgutan gitudlo sa mga guwardiya kinsa nakaila sa ilang nawong atol sa atake.

Samtang, sukad niadtong milabay nga semana, ang Davao del Norte naa sa red alert status human sa pag-atake sa Macondray ug ang joint peace and security coordination meeting nga gihimo uban sa Armed Forces of the Philippines (AFP) personnel aron nga malikayan nga masubli ang sama nga insidente.

Ilang giimbita ang tanang security officers sa nagkadaiyang mga establisemento sulod sa ilang area of responsibility (AOR) ubos sa programa sa militar nga gitawag og Critical Infrastructure Protection Management Operation nga gitumong sa pagpalambo sa security measures nga giimposar sa nagkadaiyang mga kompaniya.

"We have continuously coordinated with different managers, security officers of the different corporations of business enterprise in our AOR," tin-aw ni Magistrado. (JCR)

Gipatik sa mantalaang Superbalita Davao Mayo 19, 2017.

View Comments