5 patay, 61 nasikop sa ronda | SunStar

5 patay, 61 nasikop sa ronda

Time to read
1 minute
Read so far

5 patay, 61 nasikop sa ronda

Friday, May 19, 2017

DAVAO. Gibantayan sa mga sakop sa Special Weapons and Tactics (Swat) ang mga nadakpan nga personalidad sa Davao City Police Office covered court human gilusad ang “One Time, Big Time” Major Anti-criminality and Terrorist Operations sa mga awtoridad sa 10 ka barangay sa dakbayan Biyernes. (Macky Lim)

LIMA ang patay samtang 61 ang nasikop ug mokabat sa P2 milyones ang kantidad sa nakumpiska nga druga sa gilusad nga "One Time, Big Time" drug operations sa Davao City Police Office (DCPO), uban sa koordinasyon sa ubang unit sa awtoridad, Biyernes sa kaadlawon.

Kinse ka mga search warrants ug 25 ka mga warrant of arrests ang gipagula sa Regional Trial Court (RTC) sa Davao Region nga maoy gidala sa awtoridad sa pag-ronda.

Dungan sa pagsilbi sa mga warrants, ang paglusad og onse ka mga drug busts hinungdan sa pagkasikop sa napulo ka mga babaye ug 56 ka mga lalaki sa napulo ka mga barangay, ubos sa lima ka istasyon sa kapulisan sa DCPO.

Sumala ni DCPO director Senior Superintendent Alexander Tagum nga epekto kini sa ilang gipakusgan nga Oplan Double Barrel Alpha.

"Hinuon walay mga prominent families nga na-involved sa atong ronda, ug kini siya resulta sa atong Oplan TapHang ug TukHang," sulti ni Tagum sa hamubo nga press conference kagahapon sa covered court sa DCPO.

5 patay kay misukol

Ang Investigation Detective and Management Branch (IDMB) ug Drug Enforcement Unit (M2) intel branch sa DCPO naka-niyutralisa og duha ka gituohang pusher gumikan giingong misukol ug gipusil ang mga pulis atol sa pagsilbi sa warrant.

Napatay sab sa Bunawan Police Station ang usa ka Abdul Jimlani, hamtong, Purok Leader sa Purok 6, Barangay Ilang, Bunawan District human giingong misukol dihang padung ang mga pulis kaniya.

Mao sab ang nahitabo sa San Pedro Police Station ug Sasa Police Station kinsa nakapatay og tagsa-tagsa ka mga gituohang pusher gumikan misukol kini ug nakuha sa ilang posisyon ang .38 revolver nga armas.

Minilyon nga ebidensiya

Human sa ronda, misumada sa P2,071,500 ang kantidad sa shabu nga nakumpiska gikan sa mga dinakpan nga motimbang sa 138.1 gramos.

Nakumpiska sab ang napulo ka motorsiklo ug usa ka sidecar nga gituohang mga carnapped vehicles samtang narekober sab ang unom ka mga low powered firearms (LPF) ug dunay usa ka granada ug usa ka dinamita.

Ang Criminal Investigation and Detection Group-Davao maoy mosubay sa pagpasaka og kaso sa mga dinakpan, samtang monituron sab sa Philippine Drugs Enforcement Agency sa Davao ang mga dapit nga gikatahong duna pa'y naglihok nga ilegal nga druga.

Gipanganti sab sa DCPO nga mopahigayon pa sila og halapad nga ronda aron hingpit nga maminusan ang paghitak sa ilegal nga druga sa dakbayan.

Gipatik sa mantalaang Superbalita Davao Mayo 20, 2017.

View Comments