Babaye giluthang sa atubangan sa ospital | SunStar

Babaye giluthang sa atubangan sa ospital

Time to read
less than
1 minute
Read so far

Babaye giluthang sa atubangan sa ospital

Friday, May 19, 2017

MONTEVISTA, Comval Province -- Nadala sa ospital ang usa ka babaye human gipusil sa Barangay Bankerohan Sur, alas 10:35 sa gabii, Miyerkules, Mayo 17.

Biktima giila nga si Jiryl Porter, 32, minyo, nagpuyo sa Purok 7, Barangay Siocon, Compostela sa maong probinsiya.

Sa interbyu sa SuperBalita, gibutyag ni Police Senior Inspector Sawiden Nor, hepe sa Montevista Municipal Police Station, nga ang biktima miadto sa Compostela Valley Provincial Hospital aron mag-duty isip on the job training (OJT) sa Health Care Services nga kurso.

Pag-abot sa atubangan sa ospital, minaug ang biktima sa iyang gimanehong Fortuner.

Apan usa ka wala mailhing lalaki ang miduol ug walay daghang istorya gipusil siya kinsa naigo sa nagkadaiyang bahin sa lawas.

Dali siyang gitabang ug gisulod sa ospital kon diin siya mag-duty unta.

Wala madugay, gibalhin sab siya sa Davao Regional Medical Center tungod sa talandungon nga kondisyon.

Sa pagproseso sa crime scene, narekober sa mga imbestigador ang upat ka basiyo sa bala sa kalibre .45 nga pistola.

Duha sab ka balinis ang narekober gikan sa lawas sa biktima.

Miguwa sa imbestigasyon nga ang suspek yanong naglakaw paingon sa National Highway diin dunay naghulat nga motorsiklo.

Paspas nga misibat ang mga suspek paingon sa wala matinong direksiyon.

Gidason ni Police Senior Inspector Nor nga gisusi nila ang kuha sa closed-circuit television (CCTV) camera sa ospital apan wala makuha ang insidente.

Daghan ang anggulo nga gilantaw sa kapulisan usa na niini ang negusyo apan padayon pa ang ilang imbestigasyon. (Rockyben S. Catisay)

Gipatik sa mantalaang Superbalita Davao Mayo 20, 2017.

View Comments