DAVAO OCCIDENTAL -- Nangita na og paagi ang ang gobernador ning lalawigan aron makuha ang 64 ka sakop sa tribung Tagakaolo gikan sa lungsod sa Malita human naipit sa kagubot didto sa Marawi City.
Nasayran nga buot sa 64 ka mga sakop sa tribu nga madala na sila padung Iligan City aron makauli na sa Malita human nabalaka nga madamay sa padayong binakbakay sa militar ug grupo sa teroristang Maute.
Ang 64 ka sakop sa tribu, mga trabahante sa konstruksyon ug kuyog pa ang ilang pamilya dihang nipasilong sa provincial headquarters sa kapulisan didto sa Barangay Lancaf, Marawi.
Nagpakitabang ang mga naipit nga pamilya sa Provincial Crisis Management Committee (PCMC) nga makauli na sa Malita human wa na silay pagkaon sa lugar ug aduna pay mga gagmay nga anak nga makaluluoy na ang kahimtang.
Hinuon, nakaabot na kang Davao Occidental Governor Claude Bautista ang kasayuran hinungdan nga gipangitaan dayon niini og solusyon ang sitwasyon aron hinanaling makuha ang mga iyang mga molupyo.
Gitataw ni Marivic Hubac, sekretarya ni Bautista, nga nakig-alayon na sila sa kung unsaon madala sa siyudad sa Iligan ang mga naipit aron didto na sila kuhaon og sakyanan sa ilang lokal nga gobyerno.
Nanimpalad lamang sila sa pagpanarbaho apan nameligro ilang kinabuhi tungod sa giyera sa lugar. (OBD)