DALING nakapangayog panabang ang usa ka 18-anyos nga dalaga human gisulod sa 40-anyos nga iyang silangan ang ilang balay diin siya gihagit og sex dungan sa paghasu-haso sa iyang kinatawo.
Ang insidente nahitabo ala 1:00 sa kaadlawon niadtong Sabado didto sa Purok 8, Barangay Baracayo, Toril District, dakbayan sa Davao.
Nagpatala sa kapulisan mao si Rina (bansagon gitago sa SuperBalita Davao), 18, nagpuyo sa Purok 8 sa nasampit nga barangay.
Subay sa blotter nga natala ni Senior Police Officer 1 (SPO1) Rodel Daguio sa Toril Police Station, nakamata si Rina dihang gisulod siya sa lalaki nga si alyas Mario, 40, nagpuyo ra sab sa Purok 8.
Gisaysay ni Rina nga dihang nakamata na siya, gihagit siya ni Mario nga mga sex sila.
"Rina, mag-sex tah," hagit ni Mario sa dalaga.
Dali sab nga nakamata ang live-in partner sa biktima nga si Gerry ug gibaharan ang lalaki hinungdan nga dali kining migawas sa ilang balay.
Apan dihang nahinanok na sab sila, dangtan og baynte minutos, mibalik na sab si Mario ug naghasu-haso sa iyang kinatawo atubangan ni Rina.
Dugang nasayran nga diha na nakamata si Rina dihang nakapabuhagay na si Mario sa iyang gibati ngadto kaniya kinsa seksi kaayong natulog uban sa iyang kapuyo.
Ang reklamo gihandos na sa barangay level aron didto sila mahusay. (JPC)