ANG Department of Public Works and Highways (DPWH)-Davao Region nagseguro sa dakbayan sa Davao sa ilang kooperasyon sa ordinansa nga giduso ni Davao City Councilor Jesus Joseph Zozobrado sa pagbutang og rasonable nga time limit sa mga proyekto nga kalsada aron masulbad ang suliran sa trapiko.
Base sa migawas nga balita, si Zozobrado nagtuo nga pipila sa mga proyekto dunay di makatarunganon nga kalangay mao nga naghuot ang trapiko sa dakbayan ug ang mga sakyanan paagion sa laing dalan samtang nagpadayon ang proyekto.
Si DPWH-Davao Region spokesperson Dean Ortiz, sa pakighinabi, nagsulti nga ang DPWH kanunay abli sa mga suhestiyon ug rekomendasyon partikular nga gikan sa mayor ug mga konsehal sa siyudad.
Apan, siya nagsulti nga ila sab sundon ang ilang kaugalingon nga time frame sanglit dunay na silay plano niini nga eskedyul uban sa mga kontraktor.
"Rest assured that our time frame on every project is well-planned," suma ni Ortiz.
Bisan pa nga dunay insaktong plano ang matag proyekto subay sa time frame, suma ni Ortiz, lisud malikayan ang mga problema nga masinati sa unahan.
Siya nagsulti nga ang kasagaran nga makalangan sa mga proyekto mao ang utilities sa lokasyon sa konstruksyon sa kalsada.
"For example, road-widening projects do not get easily finished as there are electric posts from Davao Light and water pipes from water district on the project site that will be affected. This will significantly cause a major delay if not settled," suma ni Ortiz. (Bomie Lane S. Castillo)