ANG Police Regional Office (PRO)-Davao Region miawhag sa publiko nga magbinantayon sa mga impormasyong mikatap sa social media kalabot sa plano sa terorista nga maglusad og kagubot sa mga dagkong dakbayan.
Si PRO-Davao Region spokesperson Police Senior Inspector Catherine dela Rey, sa mensahe sa text Martes, Hunyo 20, nagsulti nga si PRO-Davao regional director Police Chief Superintendent Manuel Gaerlan mipadayag nga di sila makapagawas og pamahayag nga magkompirma o magbakwi sa impormasyon nga gikan sa ilang buhatan ang intelligence report.
“The public is advised to discern what is true and fake news,” suma ni Gaerlan.
“We cannot confirm or deny as of this time,” suma ni Gaerlan, sa iyang mensahe sa text, sanglit wa pa niya nakita ang intelligence report.
Si Gaerlan nagtumbok sa gipaskin sa online nga dunay impormasyon diin siya naghangyo sa Bureau of Fire Protection (BFP)-Davao regional director Fire Senior Superintendent Mauricio Ramos nga motambong sa emergency contingency meeting niadtong Hunyo 19 sa Camp Quintin Merecido, Buhangin, Davao City aron hisgutan ang kalisdanan sa seguridad human sa ilang intelligence report nga nadawat.
Ang intelligence report nagkanayon nga dunay dungan nga pagpangatake nga himuon sa Maute Terror Group sa mga dagkong dakbayan karong Hunyo 30.
Kini mahitabo atol sa adlaw nga Biyernes diin ang truck nga magkarga og liquefied petroleum gas (LPG) ilang i-hijack ug gamiton ang maong sakyanan sa pagpamomba.
Ang targets, suma sa usa ka pahina nga dokumento, mao kadtong mga lugar nga daghang tawo sama sa simbahan, mga malls, ug uban pa.
Giingon nga 20 ka mga bag-ong migradwar sa pagbansay sa paggama og improvised explosive device (IED) ang ipakatag lakip na mga langyaw nga miyembro sa grupo ang gitahasan nga mohimo sa pagpangatake.
Si Gaerlan nagpahimangno sa publiko nga susihon ang ilang mabasa sa nagkadaiyang social media platforms diin nagkatag karon ang peke nga balita.