Army milimod nga maoy nag-rakrak sa pamilya sa Compostela Valley | SunStar

Army milimod nga maoy nag-rakrak sa pamilya sa Compostela Valley

Time to read
1 minute
Read so far

Army milimod nga maoy nag-rakrak sa pamilya sa Compostela Valley

Sunday, July 16, 2017

ANG 10th Infantry Division (ID) milimod sa sa alegasyon sa mga kaalyadong organisasyon sa National Democratic Front nga ang militar maoy namusil sa balay sa pamilyang Arado didto sa Barangay Anitapan, Mabini, Compostela Valley Province.

Subay sa report sa 46th Infantry Battalion (IB), ang pagpamusil sa panimalay sa pamilyang Arado nahitabo alas 7:30 sa gabii niadtong Huwebes, Hulyo 13.

Giingon nga wa mailhing mga tawo ang namusil sa balay sa pamilyang Arado dayon daling miikyas padung sa Sitio Post 4 sa maong barangay.

Dugang pa, ang insidente miresulta sa kamatayon ni Carolina Arado, 56, ug misamad sa laing upat ka mga tawo nga sila Charlito Arado, 59, bana ni Carolina, Analisa Arado, 30, umagad ni Carolina, ug duha ka mga menor nga sila Arjun Arado, 12 ug Junior Arado, 8.

Ang tropa sa 46th IB miresponde sa maong insidente, nagtambal sa mga naangol ug naghatag og ayuda sa purok leader samtang gidala ang mga biktima sa tambalanan.

Suma sa 10th ID, istrikto nilang gituman ang Human Rights ug International Humanitarian Law ug ubang balaod sa Pilipinas.

Dugang pa nila nga di kabahin sa ilang operasyon ang mga way armas nga sibilyan.

Ang ilang Community Support Program epektibo sa pagtabang sa mga lokal nga gobyerno sa paghatud sa mga serbisyo publiko sa katawhan sa Compostela Valley.

Tungod sa pasangil, nasubo ang militar nga kanunay maigo sa propaganda sa mga walhong organisasyon aron madaut ang imahe sa militar.

Giawhag nila ang maong mga organisasyon nga mopasaka og kaso sa mga sundalo ngadto sa korte.

Gipaneguro sab nila ang kooperasyon sa imbestigasyon aron ipakita ang propesyonalismo sa ilang ranko.

Gipatik sa mantalaang Superbalita Davao Hulyo 17, 2017.

View Comments