Lola nasunog; 50 balay ugdaw sa sunog | SunStar

Lola nasunog; 50 balay ugdaw sa sunog

Time to read
less than
1 minute
Read so far

Lola nasunog; 50 balay ugdaw sa sunog

Sunday, August 13, 2017

DAVAO. Makita ang pagdilaab sa kalayo ug baga nga aso sa pag-ulbo sa dakong sunog alas 5 sa buntag Sabado, Agosto 12, sa Purok 69, Riverbed, Barangay 21-C, Poblacion, Quezon Boulevard, dakbayan sa Davao. (Jeepy P. Compio)

USA ka 60-anyos nga lola ug laing duha ang nasamdan sa pag-ulbo sa dakong sunog alas 5 sa buntag Sabado, Agosto 12, sa Purok 69, Riverbed, Barangay 21-C, Poblacion, Quezon Boulevard, dakbayan sa Davao.

Ang namatay mao si Zenaida Tan, 60, usa ka differently abled person, samtang duha ang angol lakip na ang igsuon sa biktima nga sukad sa pagsuwat sa balita Sabado, wa pa nasayran ang mga pangalan.

Sumala sa inisyal nga imbestigasyon sa Bureau of Fire Protection (BFP) Davao Central Fire District nga usa ka lampara nga nahulog ang hinungdan sa pag-ulbo sa kalayo sanglit gama sa mga light materials ang mga balay sa dapit.

Giingon nga naputlan og kuryente ang tupad nga balay sa biktima nga gipanag-iyahan sa usa ka Rommel Asdali hinungdan nga nagmantiner una sila'g lampara diin aksidente kini nga nahulog.

Gibana-banang anaa sa 50 ka mga balay ang naugdaw sa kalayo, diin mokabat sa 90 ka mga pamilya ug 195 ka mga indibiduwal ang nahimong mga biktima.

Hinuon, daling nagpadala og pasiunang tabang sama sa pagkaon, sinina ug gamit pantulog ang Davao City Social Services and Development Office ngadto sa mga nasunogan. (Jeepy P. Compio)

Gipatik sa mantalaang Superbalita Davao Agosto 13, 2017.

View Comments