Negusyante gipatay sa 'kustomer' | SunStar

Negusyante gipatay sa 'kustomer'

Time to read
less than
1 minute
Read so far

Negusyante gipatay sa 'kustomer'

Sunday, August 13, 2017

DIGOS CITY -- Gisulod sa duha ka wa mailhing mamumuno ang usa ka biyudang negusyante sa gipanag-iyahan nga battery shop ug gipusil patay.

Nahitabo ang pagpamusil didto sa Purok Kalapati, dalang Mabini Superhighway sa Barangay Zone 3, alas 10:00 sa buntag, Sabado.

Ang biktima nga nailhang si Catalina Javay Dolotena, way daghang rason nga gipusil sa mga suspek nga gilayong namatay.

Mga nakasaksi sa nahitabo nagbutyag sa kapulisan nga paspas miiktad ang mga suspek sakay sa RS Yamaha 110 nga kolor Maroon.

Si Senior Police Officer 1 Reagan Patricio, imbestigador sa Digos City Police Office nagkanayon nga nagpaaron-ingnon nga kostumer ang nag-angkas nga mga suspek kinsa maoy nisulod sa tindahan ug namusil sa biktima tumong sa ulo.

Gihulagway sa kapulisan nga dunay gitas-on nga lima ka tiil ug upat ka pulgadang ang gunman samtang ang drayber sa motor nagsul-ob og kolor pulang t-shirt, nagkalo ug itumon.

Biktima, asoy ni Patricio, gidala pa ngadto sa Sunga Hospital apan gideklara sa mga nag-atimang doktor nga patay na.

Wa na maabti sa kapulisan ang mga suspek nga misibat padung sa dalang Mabini Extension ug gibilin ang dalang 12-bolts battery gikan sa tindahan.

Di pa masulti sa mga awtoridad ang motibo sa krimen samtang padayon ang ilang hot pursuit operation.

Gipatik sa mantalaang Superbalita Davao Agosto 14, 2017.

View Comments