Tag-iya sa giabandona nga sakyanan nakuhaan og pusil | SunStar

Tag-iya sa giabandona nga sakyanan nakuhaan og pusil

Time to read
1 minute
Read so far

Tag-iya sa giabandona nga sakyanan nakuhaan og pusil

Sunday, August 13, 2017

DIGOS CITY -- Gikasohan na sa kapulisan ang usa ka lalaking niangkon nga tag-iya sa giabandonang sakyanan sa utlanang bahin sa mga barangay sa San Jose ug San Miguel ning dakbayan human nakuhaan og armas, alas 8:45 sa gabii, Biyernes, Agosto 11.

Giila ang suspek nga si Hal Pawas Guimat, 40, minyo, molupyo sa Purok Maguindanao, Barangay Labangal, dakbayan sa General Santos.

Si Superintendent Demetrius Taypin, hepe sa Digos City Police Office (DCPO), nagkanayon nga natingala ang mga barangay tanod nga nagpatrolya sa lugar human gibiyaan ang sakyanan duol sa publikong sementeryo hinungdan nga giukoy kuyog si Barangay Kagawad Charlie Revilla.

Gilayong miabot ang tag-iya niini nga unang nagpaila nga usa ka Alvin Lumabas.

Apan dihang giiwagan og flashlight ang sud sa sakyanan, nakita sa mga tanod ang duha ka mga armas nga anaa sa salog nga bahin sa likod sa lingkuranan sa drayber.

Nakig-alayon dayon ang mga tanod sa DCPO hinungdan nga nakuha nila ang duha ka kalibre .45 nga pistola nga puno sa mga buhing bala ang magazine niini.

Matud ni Taypin nga dihang gisita sa iyang mga ginsakpan ang suspek wa kini ikapakita nga Permit to Carry ug lisensiya sa mga armas mao nga gilayong giposasan.

Samtang sa dihang girekisa sa kapulisan ang lawas ni Lumabas, narekober nila ang salaping mobalor og P10,360, ug tulo ka nagkadaiyang ATM cards.

Nakuha sab gikan sa posisyon sa suspek ang usa ka non-professional driver's license ni Ali-Khan Buday Ali hinungdan nga gipalawman na sa kapulisan ang imbestigasyon aron masuta ang trabaho sa suspek.

Sa kasamtangan, nagtingkagol na sa selda sa kapulisan ang dinakpan human giatubang ang kasong paglapas sa Republic Act 10591 kun illegal possession of firearms and ammunitions. (Orlando B. Dinoy )

Gipatik sa mantalaang Superbalita Davao Agosto 13, 2017.

View Comments