Mga armas gipalusot, nasakmit | SunStar

Mga armas gipalusot, nasakmit

Time to read
1 minute
Read so far

Mga armas gipalusot, nasakmit

Monday, August 21, 2017

PADAYON pa nga gisubay sa kapulisan sa Bunawan Police Station sa Davao City Police Office (DCPO) kung kinsay tag-iya sa bag nga puno og armas nga gisakay sa usa ka bus gikan Tagbilaran City, nga naharang alas 8 sa buntag sa checkpoint sa Task Force Davao (TFD), sa Barangay Licanan, Bunawan District, Davao City.

Sud sa usa ka bag nga nakita sa Bachelor bus ang pito ka .45 nga pistola ug usa ka Uzi machine.

Mokabat sa 27 ka mga pasahero sa maong bus kinsa temporaryong giimbitahan sa kapulisan alang sa ilang mga panguntana kinsay tag-iya sa bag.

"We are presently investigating the bus conductor and the 27 passengers, we have also two additional persons of interest who triggered our Facial Recognition Device and now being interrogated by our intelligence team," mensahe ni DCPO director Senior Superintendent Alexander Tagum.

Pag-abot sa bus sa TFD checkpoint, mihunong kini aron inspeksyunon, dihang natingala ang konduktor nganong bug-at ang usa ka bag dihang iya kining gialsa aron ipadaplin gikan sa running-board container sa ilawom sa bus.

Gilayon dayon niyang gipahibalo sa mga personahe sa TFD hinungdan nga nanawag dayon silang taga Explosive Ordnance Disposal (EOD) team DCPO ingon man ang K-9 unit.

Nakurat sila dihang gilingkuran ang bag sa K-9 Dog, nagpasabot kini nga dunay kadudahang butang.

Alas 9 sa buntag, gibutang sa EOD ang bag tunga sa kalsada og gi-defuse kini sa pamasin nga dunay improvised explosive device, apan nasuta nga puro armas ang sulod.

Ang kapulisan sa Bunawan Police Station padayong naghimo og imbestigasyon aron masuta ang tag-iya sa maong bag.

Gipatik sa mantalaang Superbalita Davao Agosto 22, 2017.

View Comments