Job fair gidugokan sa nangita'g mga trabaho | SunStar

Job fair gidugokan sa nangita'g mga trabaho

Time to read
1 minute
Read so far

Job fair gidugokan sa nangita'g mga trabaho

Wednesday, September 13, 2017

LIBOAN ka mga aplikante og mga trabaho miduyog sa job fair kagahapon didto sa NCCC Mall, Matina, kon diin gatusan ka aplikante sab ang nakuha "on-the-spot" sa mga lokal ug langyaw nga kompaniya.

Ang job fair gipangunahan sa Office of Davao City Councilor Jesus Melchor Quitain Jr., Department of Labor and Employment (Dole), Public Employment Service Office (Peso).

Gisulti ni Konsehal Quitain nga daghang mga aplikante sa job fair kagahapon nagpadayag nga daghang Pinoy nag-atubang pa og kakuwang sa oportunidad sa trabaho sa nasud.

Kasagaran sa mga aplikante, matud niya, bag-o pang migraduwar kinsa nangita og kompaniya aron nga makasugod og trabaho ug kadtong wala pa makatapos sa ilang pagtuon sa paglaum nga makasulod og trabaho sa gawas.

Dunay 35 ka lokal ug nasyonal nga kompaniya naglangkob sa nagkadaiyang sektor gikan sa lending, manufacturing, telecommunication, agriculture, ug overseas recruitment nga misalmot sa job fair.

Gibutyag ni Quitain nga ang job fairs sa nasud kinahanglan nga himuong regular basis aron nga mahan-ay sa agenda ni Presidente Rodrigo Duterte sa pagpakubos sa poverty rate ug magpataas sa employment rate sa nasud sa 2022.

"As it is my first time to organize a job fair, I was confronted with the reality of how important the role of government is in providing jobs for its people," sumala pa niya.

Tungod niini, sumala niya, ang iyang buhatan maglusad og usa o duha pa ka job fairs sa siyudad una matapos ning tuiga pinaagi sa pagpakig-alayon sa uban pang mga ahensiya sa kagamhanan ug sa non-government aron nga daghan pang mga kompaniya gikan sa nagkadaiyang bahin sa nasud mosalmot.

Iya sab nga gidasig ang uban pang non-government agencies ug pribadong organisasyon nga motakda og dugang pang mga job fairs aron tabangan ang pagpakusog sa kampanya sa kagamhanan sa paghanyag og dugang pang mga oportunidad nga trabaho sa tanang mga Pinoy.

Gipatik sa mantalaang Superbalita Davao Septembre 14, 2017.

View Comments