MIDSAYAP, North Cotabato -- Nagbalik na ang maayong relasyon sa magkaaway nga pamilya sa Barangay Central Labas, Midsayap, North Cotabato utlanan sa Northern Kabuntalan, Maguindanao.
Nanguna sa peace dialogue si Maguindanao Deputy Governor Datu Ramil Dilangalen uban sila 34th Infantry Battalion sa Philippine Army commanding officer Lieutenant Colonel Angelo Lutera, Midsayap chief of policeSupt. Gilbert Tuzon, Philippine Government/Moro Islamic Liberation Front (MILF) Ceasefire Committee, mga Christian and Muslim Elders, local government unit ug barangay officials, MILF ug Moro National Liberation Front Forces.
Naggakos ug naghinilakay ang magkaaway nga pamilya tali nila Barangay Kapitan Pawa Tapoli ug iyang pag-umangkon nga si Barangay Kagawad Datu Bedo Madendog nga pulos mga molupyo sa Barangay Central Labas sa Midsayap.
Kahinumdoman nga kapila na ka higayon nga nagka-engkwentro ang duha ka pundok gumikan sa personal nga dumot sa pamilya o rido.
Daghang kinabuhi na ang nakalas ug naangol sa engkwentro sa magkaaway nga pamilya nga pulos miyembro sa MILF.
Gitahasan mismo ni Governor Esmael “Toto” Mangudadatu si Deputy Governor Datu Ramil Dilangalen sa Peace Dialogue gumikan ang Barangay Central Labas sa Midsayap utlanan lamang sa probinsiya sa Maguindanao.
Nagkasabot ang duha ka pamilya nga tapuson na ang ilang away ug manginabuhing malinawon.
Nanghinaut sab ang mga opisyal sa militar ug kapulisan nga dili na moulbo ang kagubot sa maong dapit. (Edgar Fuerzas)