ANG Department of Education (DepEd)-Davao Region mikanayon nga walay pahimangno gikan sa ilang sentrong buhatan bahin sa pagsuspende sa mga klase sa pampubliko ug pribadong tulunghaan sa rehiyon human si Presidente Rodrigo Duterte nagpahibawo sa pagkansela sa trabaho sa gobyeryo ug mga klase alang sa “National Day of Protests” inig Septembre 21.
Sa paghinabi uban kang DepEd-Davao Region Spokesperson Jenielito Atillo, gikanayon niini nga ang central office, sa bag-o nga pahimangno, nagmando lang sa pagsuspende sa mga klase sa National Capital Region (NCR) area, way labot ang uban pang rehiyon sa nasud.
Matud ni Atillo nga ang rason sa wa paglakip sa ubang mga rehiyon sa "advisory" posibleng tungod sa kadaghang ihap sa mga tawong magprotesta sa NCR nga gilaumang magtigum itandi sa ubang mga rehiyon atol sa anibersaryo sa pagdeklara ni kanhi Presidente Ferdinand Marcos og martial law.
Apan, sumala niya nga ang DepEd-Davao Region padayon nga maghuwat og dugang instruksiyon gikan sa ilang sentral nga buhatan kon ang ubang rehiyon gawas sa NCR maapil sa maong mando.
"There are possibilities that they announce it late, even a night before the event," sigun ni Atillo.
Niadtong Lunes, Septembre 18, si Presidente Duterte nagpahibawo nga himuon ang Septembre 21 isip "day of protest" nga di magdeklara niini nga opisyal nga national holiday.
Giimbitahan ni Duterte kadtong dunay mga reklamo batok sa kagamhanan nga molusad og protesta ug rali sa maogn adlaw basta way himuong krimen ug kasamok.
"I am announcing that I am ordering a holiday so no one will get hurt, in case of demonstration and it gets chaotic," matud niya. (BSC)