DOCPPSC gipasidunggan isip Best Provincial Public Safety Company

DAVAO OCCIDENTAL - Nakadawat og pasidungog ang Davao Occidental Provincial Public Safety Company (DOCPPSC) isip maoy pinakamaayong hut-ong sa Davao Region.

Mismong si Superintendent Samson Kimayong, provincial commander sa DOCPPSC, ang nidawat sa pasidungog gikan kang Philippine National Police Chief General Director Ronald dela Rosa atol sa ika-116 nga police service anniversary sa Camp Mericido di pa dugay.

Si Kimayong nagbutyag nga dako nilang dungog ang pag-ila sa ilang kompanya sa kapulisan sanglit napakita nila sa katawhan ang maayong panerbisyo.

Dako sab og gikatabang ang DOCPPSC sa pagmentinar sa kahapsay'g kalinaw sa probinsiya.

Matud ni Kimayong nga di lang sa Davao Region, sanglit naangkon sab nila ang ikatulong puwesto sa national level diin laing pasidungog ang ilang naangkon.

Gumikan niini, paningkamutan pa sa DOCPPSC nga mas mapalambo ang ilang paghatud sa maayong serbisyo ngadto sa publiko.

Kanunay na nga nagahimo og patrolya ang mga sakop ni Kimayong sa mga bukirang bahin sa probinsiya.

Kahibaloang niadtong Sabado lang, usa ka sakop sa rebeldeng New People's Army ang napatay dihang naka-engkuwentro sa ilang puwersa uban sa panabang sa 73rd Infantry Battalion sa Philippine Army.

Si Kimayong nagbutyag nga nangandam na sab sila alang sa pagpahugot sa seguridad sa probinsiya sanglit taliabot ang paghandom sa ikaduhang tuig nga anibersaryo sa pagkamugna sa Davao Occidental diin daghang aktibidades.

Mahitabo ang usa ka semana nga selebrasyon sa katapusang semana sa bulan sa Oktubre. (OBD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph