Gaerlan: Pulis andam bisan asa ma-assign | SunStar

Gaerlan: Pulis andam bisan asa ma-assign

Time to read
less than
1 minute
Read so far

Gaerlan: Pulis andam bisan asa ma-assign

Tuesday, September 26, 2017

GIKINAHANGLAN nga preparado ang tanang kapulisan kung ugaling ipang-assign sila sa lagyong mga dapit.

Kini ang nahimong pamahayag ni Police Regional Office (PRO)-Davao Region human sa sugyot ni Philippine National Police Director General Ronald dela Rosa nga mokuha siya'g mga pulis gikan sa Davao City nga maoy iyang ihulip sa mga pulis sa Caloocan City.

Sumala ni PRO-Davao Region director Chief Superintendent Manuel Gaerlan nga kinahanglan andam ang mga pulis, apan mas maayong subayon una ang mga ranggo aron di kini magkulang pag-abot sa panahon.

Gipasabot ni Gaerlan nga kung makuhaan og mga Chief Inspector ug mga Senior Inspector ang Davao City Police Office (DCPO) basin magkulang unya abot sa panahon nga mahitabo ang regular movement sa mga ranggo.

"Bisan naa nay mga kanya kanyang pamilya ang atong mga kapulisan, dapat preparado gihapon kung asa man sila mabutang," ingon ni Gaerlan.

Subay sa maong istorya, wa gitugtan ni Davao City Mayor Sara Duterte-Carpio ang plano sa nasyonal nga pulisya nga panguhaon ang pipila ka mga pulis sa DCPO nga ibutang sa Caloocan City. (JPC/Eubz Mamacos, ADDU Intern)

Gipatik sa mantalaang Superbalita Davao Septembre 27, 2017.

View Comments