Dalagita gitadtad sa ama-ama | SunStar

Dalagita gitadtad sa ama-ama

Time to read
1 minute
Read so far

Dalagita gitadtad sa ama-ama

Wednesday, October 04, 2017

NATAGUD-TAGOD ang lawas sa usa ka 13-anyos nga batang babaye human gitadtad gamit ang sundang sa iyang ama-ama alas 4:30 sa kaadlawon niadtong Martes didto sa Sitio Sto Niño, Barangay Tres de Mayo, Digos City.

Ang biktima nailhang si Maricel Rosalita Sosmeña, 13, kinsa Grade 7 sa usa ka tunghaan sa Digos samtang ang suspek nailhang si Anthony Calamiong David, hamtong, ama-ama sa biktima, kinsa nagpakamatay human sa hitabo.

Sumala ni Police Supt. Demetrius E. Taypin, hepe sa Digos City Police Station, nagpakamatay ang suspek pinaagi sa paghikog gamit ang habol.

"Pag-abot sa atong tropa, nagbitay na ang suspek sa pultahan sa kuwarto gamit ang habol, samtang ang biktima daghang samad tinigbasan nagkulob, patay na," saysay ni Taypin nga nahinabi sa Sun.Star SuperBalita pinaagi sa telepono kagahapon.

Dugang ni Taypin nga wala pa nila nasayran unsay kinatibuk-ang hinungdan sa hitabo sanglit di pa mapanguntana ang 8-anyos nga igsuon sa biktima kinsa nakadagan dihang gisulayan na og tigbas sa suspek.

"Nakadagan ang 8-anyos, duha man god ni sila ka igsuon, gibilin sa inahan, kay nilayas man ang inahan," ingon ni Taypin.

Ang Scene of the Crime Operations (Soco) sa pagpanguna ni Senior Police Officer (SPO) 3 Arturo Salvador Jr. nagbutyag nga patay na ang duha dihang ilaha kining naabtan.

Ang inahan sa bata nga si alyas Nelia, nakurat sa hitabo dihang miuli kini nga daghan na og tawo sa ilang balay ug diha nay mga pulis.

Sumala ni Nelia nga di siya katuo nga mahimo kadto sa iyang kapuyo sanglit buotan kini ug mahigugmaon.

Gisaysay sab ni Nelia nga kampante siya nga mobalik sa ilang balay kay maayo ang tuno sa tingog sa iyang anak ug sa iyang kapuyo dihang iyaha kining gikaistorya sa cellphone duha ka oras una ang insidente.

Anaa na sa lokal nga punerarya sa Digos ang patay nga lawas sa biktima ug sa suspek.

Gipatik sa mantalaang Superbalita Davao Oktubre 05, 2017.

View Comments