Kanhi kandidatong konsehal gipatay | SunStar

Kanhi kandidatong konsehal gipatay

Time to read
less than
1 minute
Read so far

Kanhi kandidatong konsehal gipatay

Thursday, October 05, 2017

DIGOS CITY - Di pa masulti sa kapulisan ang motibo sa pagpusil patay sa usa ka negusyante kinsa kanhi midagan pagka-konsehal niadtong 2016 sa national and local elections.

Nahitabo ang insidente sa kanto sa dalang Aurora Bataan, Barangay Zone 3 ning siyudad, alas 9:40 sa gabii, Miyerkules.

Si PO2 Joel Ong, imbestigador sa Digos City Police Office (DCPO), nag-ila sa biktima nga mao si Ramil Lerio Hugan, 43, minyo, molupyo sa Purok Barungoy, Barangay Dawis ning siyudad.

Milutaw sa inisyal nga imbestigasyon nga nagtagay og ilimnong makahubog ang biktima kuyog sila si Barangay Kagawad Allan Buer Espuerta ug Andy Siguvia Alterado sa usa ka imnanan sa lugar.

Apan kalit lang mibutho ang duha ka wala mailhing mga lalaki nga nagsakay og motorsiklo.

Ang angkas sa motor way daghang rason nga mihulbot sa wa masutang matang sa armas nga gitak-in niini ug gipusil si Hugan.

Nasayran nga naigo ang biktima sa ubos nga bahin sa dughan mao nga daling gidala sa Davao del Sur Provincial Hospital (DSPH) diin gideklara siya sa nag-atimang doktor nga patay na banda alas 10:25 sa gabii.

Gihulagway sa kapulisan nga ang nagpusil naay gitas-on nga lima ka tiil ug duha ka pulgada samtang ang nagmaneho sa motor dunay gitas-on nga lima ka tiil ug tulo ka pulgada.

Nakasul-ob sab og kalo ang namusil samtang ang drayber naka-wig kinsa paspas misibat padung sa wa matinong direksiyon.

Gipalawman na sa kapulisan ang imbestigasyon aron matugkad ang motibo sa krimen ug mailhan ang mga suspek.

Gipatik sa mantalaang Superbalita Davao Oktubre 06, 2017.

View Comments