Kagawad dunay mga armas gipriso | SunStar

Kagawad dunay mga armas gipriso

Time to read
less than
1 minute
Read so far

Kagawad dunay mga armas gipriso

Friday, October 06, 2017

USA ka barangay kagawad ang nasikop sa awtoridad human gipahigayon ang search warrant operation alas 5:30 Byernes sa buntag didto sa Sitio Kadanlaan, Barangay Dahican, Mati City.

Ang suspek nailhang si Sonny Francisco Andres, kagawad sa Barangay Dahican, Mati City.

Nasikop ang suspek pinaagi sa hiniusang puwersa sa Criminal Investigation and Detection Group-Davao sa pagpanguna sa ilang team leader nga si Chief Inspector Milgrace Cajes Driz ug sa Mati City Police Station ug sa Provincial Public Safety Company sa Davao Oriental.

Sumala ni Driz nga ilang gisilbi ang search warrant nga gipagula ug gipirmahan ni Executive Judge Niño A. Batingana sa Regional Trial Court Branch 6.

Nakuha sa posisyon sa dinakpan ang duha ka .38 revolver nga armas, ug usa ka .45 nga pistola nga dunay pito ka mga buhing bala.

Una niini, gireklamo ang suspek human nagbaton og mga armas nga gituohang walay mga lisensya.

Sa kasamtangan, balhog karon ang suspek sa Davao Oriental-CIDT sa Mati City. (Jeepy P. Compio)

Gipatik sa mantalaang Superbalita Davao Oktubre 07, 2017.

View Comments