50 balay nasunog | SunStar

50 balay nasunog

Time to read
less than
1 minute
Read so far

50 balay nasunog

Thursday, October 12, 2017

MOKABAT sa 50 ka balay ang naugdaw adlawng Huwebes, Oktubre 12, sa nahitabong sunog sa Muslim Village, Purok 26, Barangay 76-A Bucana, dakbayan sa Davao.

Suma sa mga residente, ang sunog nagsugod alas 2 sa hapon gikan sa balay sa ginganlan og Jazzy.

Base sa interbyu sa mga molupyo ug Bureau of Fire Protection, ang sunog nahitabo tungod sa faulty electrical wiring.

Samtang gipawong ang kalayo sa mga bombero, migawas ang balita nga dunay 7-anyos nga bata nga babaye ang naapil sa pagkasunog.

Hinuon, si Fire Inspector James Jimenez nagsulti nga ang maong taho way kamatuoran.

Mga residente sa lugar ang naghilak apil si Lodelyn Canda kinsa nangita sa iyang anak, apan nasuta ra nga ang bata nagduwa lang og computer sa SM City sa Ecoland.

Si Canda nagsulti nga naulian ang iyang gibati nga kaguol dihang nakita ang anak.

Siya nagsulti nga nasayran niya ang sunog dihang mitawag kaniya iyang bana mao nga dali siyang mipauli gikan sa condominium nga iyang gitrabahoan.

Si Muhamidin Aminola, drayber, kinsa dunay gamay nga paso sa lawas, nagsulti nga milungtad pa og 15 minutos una mitabok ang kalayo sa ilang balay gikan sa balay ni Jazzy.

Si Nur-in Muhamad, kinsa naglaraw nga moadto sa Dubai, naghilak tungod kay ang iyang mga papeles naapil sa pagkasunog.

Napawong ang kalayo pasado alas 3 sa hapon samtang ang mga biktima temporaryong gibutang sa mosque sa maong lugar samtang giandam ang tabang sa lokal nga gobyerno.

Gipatik sa mantalaang Superbalita Davao Oktubre 13, 2017.

View Comments