Mayor Sara: RH Law istriktong ipatuman | SunStar

Mayor Sara: RH Law istriktong ipatuman

Time to read
1 minute
Read so far

Mayor Sara: RH Law istriktong ipatuman

Thursday, October 12, 2017

SI MAYOR Sara Duterte niadtong Martes nag-organisa sa team nga motabang sa pagpadali ug paglantaw sa istriktong implementasyon sa Responsible Parenthood and Reproductive Health Law of 2012 kun RH Law sa dakbayan sa Davao.

Si Mayor Duterte mipaguwa og Executive Order (EO) 39, nga pormal nga magmugna sa team.

Sa pagpaguwa sa EO, ang mayor nagtumbok sa katungod sa mga Pilipino sa akses sa gikinahanglan nga impormasyon ug serbisyo sa panglawas.

Suma niya nga ang EO miabiba usab sa EO 12 ni President Rodrigo Duterte, nga nagtinguha nga matubag ang panginahanglan sa mga Pilipino pinaagi sa striktong implementasyon sa RH Law.

Ang World Health Organization (WHO) naglatid nga ang babaye nga dunay wa mahatag nga panginahanglan alang sa pagplano sa pamilya mao kadtong mga aktibong sekswal apan wa migamit sa pamaagi sa pagpugong sa pagsabak, o report nga di buot makabaton og anak o buot malangan ang pagbaton og sunod nga anak.

Ang konsepto sa wa makuha nga panginahanglan, suma sa WHO, nagtumbok sa gintang sa reproductive intention sa babaye ug ilang kinaiya sa pagpugong sa pagsabak.

Ang WHO nagtaho nga ang wa makuha nga panginahanglan mas taas sa mga grupo sa batan-on, nga nagpuyo sa siyudad, ug babaye nga naa sa postpartum period.

Si Duterte nagtahas sa team nga maseguro ang integrasyon sa RH Law sa mga aktibidad sa miyembro nga ahensya, maghatag og report sa kahimtang sa implementasyon sa maong balaod sa dakbayan, lakip na maghimo og rekomendasyon sa pagsulbad sa kakulangon.

Ang City Implementation Team pangulohan sa mayor. Siya nagdesignar sa City Health Officer isip co-chair ug City Population Officer isip secretariat head.

Siya naghingalan sa mga miyembro gikan sa Department of Health, Department of Education, Department of Interior and Local Government, Civil Society Organization, Brokenshire Women’s Center, Liga ng mga Barangay, City Council Committee Chair on Health, City Social Services and Development Office ug Sangguniang Kabataan. (PR)

Gipatik sa mantalaang Superbalita Davao Oktubre 13, 2017.

View Comments