DAVAO DEL SUR - Nasubo ang mga kaparian sa probinsiya human nipanaw ang usa sa mga taas nga opisyal sa Katolikong Simbahan kagahapong adlawa.
Nasayran nga sa edad 86, namatay si Cebu Archbishop Emeritus Ricardo Vidal sayo sa buntag kagahapon.
Sa miaging semana, daling gidala si Vidal sa balay tambalanan human nakasinati og kalintura ug paglisud sa pagginhawa apan nisangko sa comatose.
Sumala ni Fr. Bong Templa, DCD, kura paruko sa Sta. Maria, Davao Occidental, nga nasubo sila ug ang tibuok Simbahan sa kalit nga pagpanaw sa kardinal.
Matud ni Templa nga usa ka di malimtang legasiya ang gibilin ni Vidal ug mga pagtulun-ang angayang sundon sa katilingban.
Bisan si Fr. Roberto Lagos, DCD nga nadestino sa San Isidro Labrado sa dakbayan sa Digos nagpaabot sab sa iyang pahasubo ngadto sa mga nabiyaang pamilya ni Vidal.