500,000 motambong sa asembliya sa Bangsamoro sa Maguindanao

COTABATO CITY -- Dul-an tunga ka milyon ka tawo ang motambong sa Bangsamoro General Assembly karong Nobyembre 3 hangtud 4.

Kini ipahigayon sa Maguindanao Old Capitol sa Barangay Simuay, Sultan Kudarat sa probinsiya sa Maguindanao.

Ang Bangsamoro General Assembly pangunahan sa Moro Islamic Liberation Front (MILF) ug Bangsamoro Transition Commission (BTC).

Matud ni MILF First Vice Chairman for Political Affairs ug BTC Chair Ghazali Jaafar nga ang naasoy nga asembliya pagpakita sa halapad nga suporta sa gipursige nga balaudnon nga Bangsamoro Basic Law (BBL) nga anaa na karon sa Kongreso.

Gikanayon ni Jaafar nga ang Bangsamoro general assembly suportado sab sa Moro National Liberation Front (MNLF) nga gipangulohan ni Datu Muslimin Sema.

Mimugna sab og mga komitiba ang MILF aron hapsay ug organisado nga mapahigayon ang duha ka adlaw nga Bangsamoro General Assembly.

Manguna sab sa seguridad ang MILF sa hisgutanan sa seguridad sa panagtapok uban ang kapulisan ug militar.

Posibleng motambong sa duha ka adlaw nga Bangsamoro General Assembly si Pangulong Rodrigo Duterte, mga lokal opisyal nga pangunahan ni Maguindanao Governor Esmael ”Toto” Mangudadatu ug ARMM Governor Mujiv Hataman lakip na ang mga opisyal sa kagamhanan.

Sa kasamtangan, padayon nga gipangandaman sa MILF ug BTC ang duha ka adlaw nga Bangsamoro General Assembly ilabina ang aspeto sa seguridad. (Edgar Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph