Babayeng wa nakigbalik sa kapuyo giihaw, amahan apil | SunStar

Babayeng wa nakigbalik sa kapuyo giihaw, amahan apil

Time to read
less than
1 minute
Read so far

Babayeng wa nakigbalik sa kapuyo giihaw, amahan apil

Saturday, November 11, 2017

KIDAPAWAN CITY -- Patay ang mag-amahan human gipangtigbas alas 3:40 sa kaadlawon niadtong Huwebes, Nobyembre 9, sa probinsiya sa North Cotabato.

Giila ang mga namatay nga sila si Bonifacio Monta ug iyang anak nga si Flordeliza, mga nagpuyo sa Purok 5, Barangay Pag-asa, M'lang sa nahisgutang probinsiya.

Samtang naangol sab si Kapitan Gerardo Jugilon sa Barangay Pag-asa ug ang miyembro sa Barangay Peacekeeping Action Team (BPAT) nga si Romeo Parcia.

Gibutyag ni Superintendent Bernard Tayong, tigpamaba sa North Cotabato Police Provincial Office, nga nagkalalis ang suspek nga si Antonio Lacabe, common-law husband ni Flordeliza gumikan gusto kining makigbalik ngadto sa biktima.

Apan nagmagahi ang babaye kay dili na niya gusto nga makig-ipon kang Lacabe gumikan sige lang siya kulatahon kung mahubog ug nakakita na sab siya og lain binuhat nga andam siyang pakaslan.

Gumikan sa kasuko sa suspek, gipangtigbas niini ang mag-amahan nga maoy hinungdan sa ilang kamatayon.

Naangol sab si Kapitan Jugilon ug ang BPAT nga si Parcia nga misulay sa pag-uwang sa suspek.

Nadakpan si Lacabe sa diha nga nagresponde ang mga pulis sa M’lang Municipal Police Station.

Gisang-at na sa pamilya sa mga biktima ang kasong pagpatay batok sa suspek. (Edgar E. Fuerzas)

Gipatik sa mantalaang Superbalita Davao Nobyembre 11, 2017.

View Comments