Molupyo sa DavOcc gipaamping sa PDRRMC | SunStar

Molupyo sa DavOcc gipaamping sa PDRRMC

Time to read
less than
1 minute
Read so far

Molupyo sa DavOcc gipaamping sa PDRRMC

Saturday, November 11, 2017

DAVAO OCCIDENTAL -- Nagpahimangno ang Provincial Disaster Risk Reduction and Management Council (PDRRMC) sa probinsiya ngadto sa ilang mga molupyo nga mag-amping kanunay sa bisan unsang kalamidad.

Nakasinati og mga pag-uwan ang probinsiya ug silingang Davao del Sur karong semanaha tungod sa localized thunderstorms mao nga mibaha ang pipila ka mga kasapaan ug mihumok ang yuta sa kabukiran.

Sumala ni Harry Camoro, PDDRMC action officer, nga kanunay andam ang ilang buhatan sa pagresponde sa mga takna sa emerhensiya.

Apan gipasidan-an niini ang publiko nga magbantay kanunay aron malikay sa disgrasya.

Giklaro sa PDRRMC nga way nahitabong danyos human mihapak ang 5.1 magnitude nga linog sa lungsod sa Don Marcelino, banda alas 3:23 sa hapon niadtong Miyerkules.

Nasayran sa taho sa Philippine Institute of Volcanology and Seismology nga tectonic ang linog diin adunay 112 nga gilawmon.

Nitala sab ang linog og Intensity II ug I sa General Santos City ug Alabel, Sarangani sa maong han-ay.

Gidason ni Camoro nga kanunay sab silang mihimo og earthquake drill aron masayud ang publiko sa mga angayang buhaton sa ingon niining matang sa kalamidad. (Orlando B. Dinoy)

Gipatik sa mantalaang Superbalita Davao Nobyembre 11, 2017.

View Comments