NPA gikapinusilay sa militar, mikakak | SunStar

NPA gikapinusilay sa militar, mikakak

Time to read
less than
1 minute
Read so far

NPA gikapinusilay sa militar, mikakak

Saturday, November 11, 2017

PANTUKAN, ComVal Province -- Padayon karon nga gigukod sa kasundalohan ang mga rebeldeng New People's Army (NPA) nga ilang gikapinusilay ala 1:30 sa hapon, Miyerkules, Nobyembre 9, sa Sityo Sarayon, Barangay Araibo.

Segun sa gipaguwang taho sa kapulisan nakadawat og taho ang 66th Infantry Battalion, Philippine Army kalabot sa dul-an sa 30 ka mga miyembro sa Section Committee 18, Southern Mindanao Regional Committee ug Pulang Bagani Command 6 nga giingong nangrekrut sa lugar.

Gilayong naglusad og operation ang kasundalohan nga misangpot sa engkuwentro.

Paspas nga miiktad ang mga rebelde paingon sa wala matinong direksiyon. Migamit sab og Close Air Support ug kanyon ang militar diin gibombahan ang posisyon sa NPA.

Atol sa clearing operation, nasakmit gikan sa encounter site ang 12 ka bag nga improvised explosive device (IED) ug mga wires.

Walay gitahong namatay sa han-ay sa gobyerno.

Namatikdan sab sa kasundalohan ang mga lama sa dugo sa dapit sa engkuwentro.

Nanawagan si Major General Noel Clement, commander sa 10th Infantry Division sa mga rebelde nga buot mo-surrender nga dunay mga benepisyo ug programa nga naghulat kanila. (Rockyben S. Catisay)

Gipatik sa mantalaang Superbalita Davao Nobyembre 11, 2017.

View Comments