Pastora gipusil sa ulo | SunStar

Pastora gipusil sa ulo

Time to read
less than
1 minute
Read so far

Pastora gipusil sa ulo

Saturday, November 11, 2017

COTABATO CITY -- Patay ang usa ka pastora samtang samdan ang lain pang usa human gitulis ug gipusil alas 9:40 sa buntag niadtong Huwebes, Nobyembre 9.

Giila ang namatay nga usa ka Rosalila, pastora sa usa ka relihiyong Kristiyano.

Samtang samdan sab ang kauban niini nga si Mohaimen, mga molupyo sa Barangay Kalanganan, Cotabato City.

Matud ni Cotabato City Police Office director, Senior Superintendent Rolly Octavio nga mibisita lang ang pastora sa iyang fishpond duol sa Timako Hills, Barangay Tamontaka sa dakbayan sa diha nga miabot ang duha ka wala mailhing lalaki ug namugos nga mosakay sa pumpboat nga gisakyan sa mga biktima.

Mibalibad ang pastora sa pagpasakay sa mga suspetsado gumikan gamay ang bangka ug basin unya og maunlod sa tubig.

Kalit lang mihulbot sa ilang mga armas ang duha ka lalaki nga pulos naka-facemask ug gipangpusil ang mga biktima.

Patay gilayon ang biktima nga naigo sa ulo samtang naigo sa abaga ang kauban niini apan nakalangoy paingon sa luwas nga dapit ug gitabangan sa mga molupyo.

Pagpangtulis ang gilantaw ni Cotabato City Mayor Cynthia Guiani Sayadi nga motibo sa hitabo gumikan gikuha sa mga suspek ang bag sa pastora nga dunay sulod nga P15 mil ug cellphone.

Kapulisan sa Cotabato City PNP padayon nga nag-imbestiga sa hitabo.

Gipatik sa mantalaang Superbalita Davao Nobyembre 11, 2017.

View Comments