Gipusil sa bana sa kabit | SunStar

Gipusil sa bana sa kabit

Time to read
less than
1 minute
Read so far

Gipusil sa bana sa kabit

Monday, November 20, 2017

MITUGPA sa ospital ang usa ka construction worker human gipusil sa bana sa iyang kabit alas 8 sa gabii niadtong Dominggo didto sa Purok Talisay, Barangay Buhangin Proper, dakbayan sa Davao.

Si Chief Inspector Jack Tilcag, hepe sa Buhangin Police Station, nag-ila sa biktima nga si Ernesto Garcia, 32.

Nasayran sa imbestigasyon sa kapulisan sa Buhangin nga hilabihan ang kasuko sa bana nga si Melocito Alison, 49, driver, nagpuyo sa El Rio, Bacaca Road, Barangay 19-B Poblacion, human iyang nasayran nga didto ra diay sa Purok Talisay sa Buhangin nag-adtoan ang iyang asawa.

Giingon ni Tilcag nga gi-live in sa biktima ang asawa ni Alison sud na sa usa ka bulan ug dihang nasayran niini ang hitabo, giatangan sa suspek ang biktima dayon gipusil.

"Gi-live in sa biktima ang asawa sa suspek mao nga nasuko ug giatangan sa suspek dayon gipusil mao nga nakahiagom og minor injuries sa kalawasan ang biktima," sulti ni Tilcag nga nahinabi sa SuperBalita pinaagi sa telepono kagahapon.

Human sa pagpamusil, daling misibat ang suspek ug narekober sa crime scene ang bala sa .22 nga armas.

Dugang ni Tilcag nga ilang nadawat ang impormasyon gikan sa suspek nga mo-surrender kini, butang nga giadtoan sa operatiba sa gitrabahoan niini sa usa ka dakong mall sa dalang Bajada ning dakbayan.

Gipatik sa mantalaang Superbalita Davao Nobyembre 21, 2017.

View Comments