DAVAO DEL SUR - Gipasalig sa National Union of Journalists of the Philippines (NUJP) nga tutukan ang tanang nabiktima sa media killings apil ang kontrobersiyal nga Maguindanao massacre nga sakto nga walo na ka tuig karong adlawa.
Matud ni Abogada Jo Cascolan, acting NUJP chairperosn, atol sa pagbisita niini didto sa Sitio Masalay, Ampatuan, Maguindanao niadtong Dominggo, nga dili lung-an ang pagtutok sa maong kaso ilabi na nga human na naduso sa prosekusyon ang tanang ebidensiya ug ang depensa na ang gidungog sa korte.
Nanghinaut sab ang ubang pamilya sa mga biktima nga dili undangon sa NUJP ang scholarship nga gihatag ngadto sa ilang mga anak ilabi na nga wa nay suporta ang gobyerno ngadto kanila human pipila lang ka higayon nga nakadawat og ayuda dihang bag-o pa nahuman ang ngilngig nga insidente.
Giangkon ni Merlie Prenante, 44, sa pakighinabi sa SunStar Superbalita, nga nabalaka siya nga di makaluhutay sa pagtungha ang iyang tulo ka mga anak kon maundang ang scholarship niini.
Si Merlie, asawa sa namatay'ng si Ronnie nga mamamahayag sa Gold Star Daily didto sa General Santos City, nagsulti nga naningkamot siya nga mabuhi ang iyang mga anak pinaagi sa pagsulod sa networking.
Karon dili pa maka-move on ang pamilya sa 58 ka mga biktima diin duha niini mga mamahayag human brutal ang nahiaguman sa ilang mga minahal sa kinabuhi nga igo lang mikuyog sa convoy sa asawa ni Governor Ismael Mangungudato nga mosang-at unta sa kandidatura sa eleksiyon niadtong 2009.
Gawas sa NUJP, nakatutok sab ang ubang sektor sama sa Justice Now nga gipangunahan ni Emily Lopez.
Giklaro ni Lopez nga hustisya ang gitinguha sa pamilya sa mga biktima ug dili ang salapi nga buot itanyag kanila sa mga Ampatuan.
Matud sa NUJP ug Justice Now angayang manubag ang mga suspek sa pagpamatay sa mga mamamahayag sanglit sukad 1986 adunay natala nga 178 ang namatay ug di pa dugay ang nahitabo sab didto sa Surigao City.