Lalaki napatay kay 'misukol' sa PDEA | SunStar

Lalaki napatay kay 'misukol' sa PDEA

Time to read
less than
1 minute
Read so far

Lalaki napatay kay 'misukol' sa PDEA

Thursday, December 07, 2017

DILI makatuo ang kabanay sa suspetsado nga napatay sa Philippine Drug Enforcement Agency (PDEA) Davao nga misukol kini.

Alas 3:35 sa hapon niadtong Martes, Disyembre 5, sa Purok 1, Punta, Barangay 31-D, dakbayan sa Davao mihimo og drug bust ang PDEA batok sa usa ka Alfredo Biñas III, alyas Pugoy, 28, residente sa Barangay 22-C Poblacion.

Sumala sa PDEA nga misukol ang suspek ngadto sa operatiba hinungdan nga napusilan kini ug gidala sa Southern Philippines Medical Center (SPMC) apan nakabsan kini sa kinabuhi.

Nakuha sa posisyon sa dinakpan ang usa ka .38 nga revolver, tulo ka pakite sa gituohang shabu nga mokantidad og P5,000 ingon man ang P1,000 nga marked money.

Gisulayan og kuha sa SuperBalita ang kabahin sa kabanay ug kahigalaan sa napatay diin giingon nila nga dili sila motuo nga misukol si Pugoy gumikan wa kini pusil.

Nagbangutan ang mga kabanay sa napatay kinsa nanawagan sa awtoridad nga kung dunay mga hinimoan ang pipila ka gidudahang pusher ug user, sikupon kini ug ipaagi sa proseso sa balaod sa prisohan.

Depensa sa PDEA-Davao, dugay na nilang gipailawom sa surveillance si Pugoy, apan nasuta sa awtoridad nga nagpadayon kini sa pagpamaligya og shabu ug giingong duna kini pusil.

Ang napatay gihaya sa ilang balay sa Barangay 22-C.

Gipatik sa mantalaang Superbalita Davao Disyembre 07, 2017.

View Comments