ANG Department of Health (DOH) sa rehiyon sa Davao nagbutyag nga wa pa silay mandato kon ang gobyerno mohatag tabang sa pagpa-ospital ngadto sa mga bata nga gibakunahan og Dengvaxia.
Si Doctor Annabelle Yumang, DOH-Davao assistant regional director, nagkanayon dihang gipangutana kon ang gobyerno mohatag tabang sa medikasyon ngadto sa mga nabakunahan og Dengvaxia nga kabataan kon sila magpakita og sintomas sa grabeng dengue atol sa Connect nga gihimo sa SM Lanang Premier kagahapon.
Apan siya midugang nga iyang eksperyensya, sa lain nga immunization programs sa gobyerno, kon dunay mga kaso o problema nga dala sa maong immunization, ang gobyerno moabaga sa pagpaospital sa pasyente.
Mao nga sila nag-monitor kinsa ang gibakunahan og Dengvaxia.
Siya usab nagkanayon nga ang DOH-Davao magpadala og suwat sa pribadong institusyon, lakip na pribadong medical practitioners, maghangyo kanila nga magpadala sa DOH sa listahan sa ilang mga pasyente kinsa gihatagan og Dengvaxia vaccine.
Siya nagkanayon nga kini kinahanglan nila nga ma-monitor ug maglusad og surveillance sa mga bata nga nabakunahan og Dengvaxia.
"As for the government, walang children na na-vaccinated with Dengvaxia, but we don't know sa private institutions since they have not reported to us or furnished the list of their vaccinated patients," suma niya.
Kagahapon lamang, Disyembre 7, 2017, ang suwat andam na ug ipagawas na kagahapon sa hapon ngadto sa nagkadaiyang medical societies, lakip na Davao Medical Society and the Philippine Pediatric Society-Davao Chapter.
Si Yumang midugang nga sila nakaseguro nga walay bata nga gibakunahan og Dengvaxia gikan sa gobyerno, sanglit ang Davao Region wa maapil sa unom ka lugar sa Dengvaxia pilot testing.
Siya nagkanayon nga kadtong lugar o rehiyon diin 70 porsyento sa ilang populasyon naapektuhan sa dengue virus. (Cristina E. Alivio)